Brutality of the Goddess

Mga higala, kung wala mo masayod, ako gikapoy na gayud ko ug sulat gamit and pulong nga iningles.  kini nga pulong, banyaga intawon ni.  mao ni ginagamit namo kung magtabi sa mga kalat-unan.  mao ni nga pulong among ginagamit sa pakipagtigi sa usa’t usa.  pastilan!  pagkakapoy na ug batikos aning pinulong nga ingles.

hilasan sad kos mga tawo nga gikaulaw nila ang binisaya.  mao baya ni ang atoang pulong na ginatubuan ug nakat-unang gamiton sukad pa ta mga bata.  ato-a ning kultura.  ginagamit ni sa lain-laing dapig diri sa atong kinahimtangan.  dapat taas atong panan-aw ani kay dili sad ni baduy.  ato baya ni bai!

hinaot unta sa, nga naa kita’y usa ka asignatura sa atong mga kalat-unan nga ang ginatudlo kay binisaya.  mao kini atoang tawagon nga Bisaya 11: Pagsugod-sugod ug Pagkat-on sa Pulong na Binisaya.  naa sad unta ta’y Bisaya 12: Pagsulat gamit ang Binisaya; Bisaya 21: Pakipag-tigi ug pakipagtalumpati sa Binisaya; ug Bisaya 72: Mga Ginasulat sa mga Bisdak.

Kinahanglan na natong ipasumbalik ang kulturang Binisaya sugod sa pulong kay mao lang kini ang dalan sa atong pagkat-on ug dawat sa atong pagkaBisdak.  daghan kong nailhan nga dili gayud ganahan nga gamiton ang binisaya–masdaghan kong nailhan nga gikaulaw ang ilang pagkapilipino.

ako ray maluoy nila kay sa tinud-anay jud, ang dugo sa pagkapilipino naglatay sa ilang mga ugat.  ang pagkabisaya mao ni atoang pagkatawo. 

wala ko naga-tu-o nga kitang mga bisaya masmaba ra ug maabtan kaysa mga banyaga.  taas sad ta ug maabtan kaso, wala pa gani ta kasugod ug buhat sa atong mga buluhaton, nag-una-una na ta ug huna-huna nga dili nato kaya.

bisdak ko.  wala ko naulaw ana.  oo, kinahanglan gayud na makakat-on ta sa pulong nga iningles, kinastila, ug uban pa.  pero, dapat dili ta maulaw ug dili nato itago ang atoang kultura–ang atoang pagkabisaya.

This entry was posted on Wednesday, December 14th, 2005 at 9:18 pm and is filed under Uncategorized. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.